The Notebook Fetish | I like new notebooks. I don't know why. Hang out more often, maybe we can figure it out together.

Polseras

“K-d-u-g-y g-d b-a-l-a p-e-r-m…” nagaugtas nga sulat ni Hannah  kay Dave gamit ang iya telepono.

Wala gid sang pagbag-o. Si Hannah man gihapon ang ayawan sa hinulatanay – si Dave man ang may kinahanglan o sia.

Indi lang gid magdugay matapos ‘ya mapadala ang mensahe sang nag-abot si Dave. Daw sa wala lang. Kuno abi indi lang sia ulihi malapit sa isa ka oras.

“Ay ambot, kanami sa imo. Ang imo ‘ya ala-una permi alas-otso,” hambal ni Hannah kay wala niya napunggan ang iya kaugot.

Nagngisingisi lang si Dave kag nagsabat, “Ayawan lang ‘ko timing. Ara daan si Manoy sa balay ‘ti kabalo ka man na sa iya.”

Naghipos na lang si Hannah maski nainit-init na gid sia.”Kon wala lang ‘ko naluoy sa imo,” siling niya sa kaugalingon.

“Gutom ko. Kapanyaga ka na? Wala pa ‘ko bala kakaon. Alas-onse na ‘ko namahaw ‘gina, bag-o lang ko kabatyag gutom. Kaon ‘ta anay ‘bi.”

“Indi pa ‘ta ‘to maglakat?”

“Karon lang a. Ano oras na haw? Indi man ‘na ‘to sia maghalin,” hambal ni Dave samtang ga hinayhinay na lakat pakadto sa isa ka kalan-an sa sulod sang lalagawan. “Wala ka gingutom hulat haw?”

Nagngisi si Hannah. “Daw gago ka gid bala!” hambal ‘ya dala sumbag-sumbag. Indi man magdugay lain buot ya sa isa kay kabalo sia sang gina atubang ni Dave subong. Sa pila nila ka tuig nga pag-abyanay, kabalo na gid siya kung may ginatago ini nga kabug-at.

Sang ara na sila malapit sa kalan-an nga ila kaladtuan, nag-untat si Dave kag nagsenyas sa lain na direksyon, “Mahapit ko ‘to anay ‘bi, orderi lang ‘ko number 3 kag large lang nga coke. Dasig lang ‘ko, bay’ran ‘ta lang ka pag-abot ko.”

Wala na nakasabat si Hannah kag nag-una na lang gid sia sa sa kalan-an kag naglinya. Indi lang madugay, nag-abot na iya migo kag nagsenyas nga mangita na lang sia sang pulungkuan.

Matapos ihambal sa isa sa mga babaye sa kalan-an ang ila nga gusto kaonon, nag kadto si Hannah dala ang ila numero sa kon diin gapungko si Dave.

“Ano gin bakal mo?” pamankot ni Hannah.

“Wala a. Wala na’to gali, never mind.”

Wala na nangulit si Hannah, kon ano gid man na, kabalo sia nga manugid man na sia gihapon. Nag-istoryahanay lang sila sang mga labaylabay kag indi madugay, nag-abot man dayun ila nga pagkaon.

Sa tungatunga sang ila pag-istoryahanay gulpi lang naghambal si Dave, “Amo man ‘na bala ang gusto niya di’ magkaon kami di’ sang una.”

Nagtulok si Hannah sang makadali kay Dave bag-o ‘ya naintiendihan kon sin-o ang buot ‘ya silingon.

“TLC Jumbo Burger. ‘Galing ga-order pa gid na sia chocolate sundae, ambot gani ah. Mahiligon gid ‘to sia sa tam-is pero wala gid sia nagatambok.”

Nagahipos lang si Hannah kag nagatulok sang diretso sa iya nga ginakaon nga daw kuno abi nagapaurok-urok lang sia kaon. Sang masabat na sia tani, nakita ya nga daw naurungan si Dave. Naghipos na lang siya. Matapos ang pila ka minuto, nag istorya naman liwat si Dave, pero lain naman nga topiko kag natapos sila sa pagkaon nga daw wala ‘ya lang ‘to ginmuno.

Nalipay man si Hannah nga makita ang iya sini nga abyan nga daw naga maayo na gawa ang kondisyon. Sang nagligad nga mga semana, daw indi maistorya, wala gapakita, kag wala nagauloistorya sa mga upod nila sa eskwelahan. Pero sa kon ano nga rason, gulpi lang nga daw nagbalik sa kon ano sia sang-una ining si Dave kag nakibot man sia kagina sang nagpadala ini sa iya sang aga sang mensahe nga nagapaupod. Sang ulihi, nabal-an ‘ya nga gusto lang gali sini magbisita sa iya isa ka kababata. Indi man gid ini kilala ni Hannah pero kabalo sia nga amo ini siya ang rason sang gulpi na pag-inilisahanon ni Dave. Wala na siya nakapang-indi kag dali-dali nga nagkadto sa mall kag ginpahulat ni Dave sang isa ka oras bag-o abtan.

Nanghagad si Dave lagawlagaw anay bago kuno sila magbisita ‘to sa iya nga gusto kadtuon. Si Hannah nga may gusto man nga baklon ang nagpasugot na man lang. Parehas sang halin kagina pa, wala diri wala didto ang ila istoryahanay kag daw gakasaw-ahan si Hannah sa gulpi nga pagbalik sang pagka palaistorya ni Dave.

Nagsaka sila sa babaw sang mall sa kung diin ang mga telepono ginaplastar para sa mga gusto magbakal kag didto naman liwat nakamuno si Dave parte sa tawo nga wala nila ginaistoryahan nga duha.

“Amo ‘ni ang cellphone nga gusto ‘ya baklon sang-una.”

Nangisog na nagsabat si Hannah, “Ti nabakal ‘ya?”

“Ambot, wala ‘ko kabalo.”

Naglinong sang makadali kag naghambal si Hannah, “Akig ka sa iya? Ano gin awayan nio.”

Wala nagsabat si Dave.

“Ano ni Dave man, pila na ta ka tuig kilalahay, subong ka lang matagotago sa akon. Daw gagers ka bala. Gadungandungan pa ‘ta gani paligo sang-una sang gamay pa ‘ta subong huyahuya ka na.”

Nagngisi sila nga duha sang magamay bago nagsabat si Dave.

“Wala kami nag-away. Wala na siya gin pasugtan ni Papa ‘ya mag sige upod sa akon.”

“Tuod?”

“Una amo na eh, sa ulihi nag sunggod ko kay ngaa ginpati ya man tatay ya. Ulihi ko na lang naintindihan ngaa.”

“Ngaa haw?”

“Kabalo ka naman na guro. Mga tawo daan kis-a sobra ka malisyoso kag sobra ka into. Daw sin-o gid sila nga mga mayo. Gago man to ‘bi Papa ya, porque naka kwa dako na construction project nag daw si sin-o na.”

Naghipos lang si Hannah. Naintiendihan ya gid ang tanan kag amo naman na ginapaminsar ‘ya dugay na. Daw ginpamatud-an lang sang amo sini nga istorya ni Dave. Kabalo sia nga mas madalum pa ang sabat. Pero wala ya na lang ginpadayon pa ang istoryahanay.

“Lakat na ‘ta ‘to sa iya.”

Nagduhaduha si Dave, naghipos kag nag diretso na sa nagapanaog nga hagdananupod ni Hannah.

Nagsakay sila sa jeep sa gwa sang lalagawan kag indi lang madugay, ara na sila sa ila kaladtuan. Nag ginhawa sang madalum si Dave bago sila magsulod.

“Bahala na,” pahutik na hambal ni Dave sa kaugalingon.

Nangita-ngita sila sang makadali bago nila ini nakita:

Eugene Alfred L. Valdez

Born: November 4, 1991

Died: November 5, 2011

“Goodbye, see you in the morning. We love you.”

Nagbug-at ang dughan ni Hannah, kabalo sia nga napatay ini sia pero wala siya kabalo nga tapos lang gali sang iya nga kaadlawan. Indi makatulok si Hannah kay Dave.

“Nanghagad pa ‘to siya lagaw sang birthday ’ya. Libre ya’ko kuno. Nagbalibad lang ko kay nagasunggod pa ‘ko giyapon sang amo ‘to nga tiyempo. Wala ko kabalo nga amo na ‘to gali.”

Naghana butang si Hannah kamot sa likod sang iya migo pero naka-una na ini luhod sa atubang sang pantyon. Indi makita ni Hannah kung nagahibi ang iya migo pero daw wala man sang pag-giho sa iya sini nga abaga. Wala na nakahambal si Hannah.

May ginkuot si Dave sa iya bulsa nga polseras. “Bud, regalo ko pa tani sa imo ‘ni ho. Pagkatapos mo ko ‘to ginhagad nga nang-indi ko ginkonsiyensya ko. Sang dason na adlaw, nangita ko inughatag sa imo kag nakita ko ‘ni. Galinya na ‘ko to sa ATM sang nagtext imo manghod nga naaksidente ka. Kagina lang ko nangisog nga baklon ‘ni, mayo lang kay ara pa.”

Ginaistorya ni Dave ang pantyon nga daw ara lang sa atubang ya si Eugene. Ginpabay-an na lang sia ni Hannah kag namati na lang samtang ginapunggan ang luha nga magtulo halin sa iya mata.

“Wala na ‘ko kakadto sa ospital kag sa haya mo kay nangakig ko. Nangakig ko ngaa nag tangatanga ka. Sige mo pa ‘ko na sang una sunlog kung mag-angkas ‘ko sa imo sa motor mo. Ginapadasig mo gid dalagan nga kabalo ka nahadlok ko,” hambal ni Dave samtang ginplastar ‘ya iya nga isa ka tuhod sa salog nga hilamon sang patyo.

“Kag maskin gustuhon ko, indi man ‘ko gihapon kakadto kay kabalo ko nga indi ako didto gusto ni Papa mo.”

Damodamo nga eksplinasyon ang nabati-an ni Hannah. Indi ‘ya makita ang itsura sang isa pero gakakita ya nga daw ginakuso ni Dave iya nga mata kung kaisa. Matapos ang mga traynta minutos, nagtindog si Dave kag nagbalikid sa iya. Nakita ni Hannah nga ginplastar ni Dave ang polseras nga daw bulak nga ginahalad sa patay. Nagapula ang mata ni Dave pero nagangisi ini – indi parehas sang ngisi ‘ya kagina nga daw hilaw  kungdi ngisi nga matuodtuod. Makita mo sa mata ‘ya nga natawhayan na ini.

“Sorry gid sa inyo tanan Hannah. Kapin na gid sa imo. Indi ko lang gid mabaton ang tanan kag indi ko lang gid mastorya sa inyo nga… ”

Ginkup-an sia ni Hannah sang mahugothugot gid. Nakibot si Dave pero nagpabaya na lang. Nabatyagan ‘ya nga daw nagailig pagwa ang tanan na kasubo halin sa iya nga dughan kag naintindihan ‘ya nga maski nga amatamat nagadulom ang palibot kag magaabot ang kagab-ihon,  sigurado sia nga may upod sia puli. Kag bwas aga, magasugod na ang pag-ayo sang pilas nga ara sa iya nga tagipusuon.

RockMelt Blog: Welcome to RockMelt Beta 2 - New Chat, View Later, New Twitter App, and Chromium 10

TUMBLR IS NOW ON ROCKMELT!!! DOWNLOAD NOW

daw si Justin Bieber si John Vincent